سوريا الحياة

أنت بسوريّا تمتّع بجوّا انتعش بهواها
أنت بسوريّا تمتّع ببردا و بدفاها
أنت بسوريّا سوريّا الله حماها
وبيضل يحميّا يحمي جبالا و سهولا و رباها
بتمشي بشوارع الشّام بتردّلك الرّوح الجمال و الأصالة و العراقة منها بتفوح فيّا الجديد و الأصيل و القديم من أيّام نوح بأسرارا بتبوح بنشوف فيّا الجروح اللّي تركوّا المحتلّين المستعمرين و بعدن بقيت براياتا تلوح فوق السطوح ما انحنت لبشر ولا لسلاح ما انحنت لمدفع ولا لسفّاح حاراتا القديمة و بوابا الخمسة العتيقة بتحكيلك قصّة شرف بتحكيلك الحقيقة الدقيقة عن القلوب الرقيقة بس الأقوى من الحجر الأقوى من الصّخر و الصّوان اللّي بتهدّ جبال عن قلوب الأشبال عن ورود الحديقة اللّي ما بتبال . طلاع عالصّحرا طلاع عتدمر و آثارا وشوف شموخ ملوكا و زنّوبيا و عمارا شوف أعمدتا و مسرحا الصّامد عبر الأزمان شوف الأناقة و الفخامة و إتقان البنيان و المتحف اللّي بيحوي أدوات الملوك و تماثيل لإنسانا و عملاتا اللّي ما بتشتريّا البنوك طلاع عالسّاحل عطرطوس و اللادقيّة عرمال البحر عالشّمس العاليّة عصوت الموج و الأنفاس النقيّة وشوف هالوجوه الطيّبة البهيّة زور آثار أوغاريت و بطريقك مسرح عمريت تمشّى عالكورنيش و خدلك شي سندويش أنت بسوريّا و هي فرصتك حتى تعيش .
نحنا مهد الحضارة نحنا خلقنا الحضارات نحنا أصل العمارة شوف عنّا العمارات من سوريّا طلعت الديانات و الكتب السماويّة من عنا الأنبيا والرّسل و الخشوع و الرّبّانيّة نحنا أصل الدّني أصل الثقافة و الأبجديّة أصل العلوم و الفلسفة و القوانين الرياضيّة نحنا أهل الكرامة و الشهامة و الفخامة و التضحية و العزة نحنا فخر الكرة الأرضيّة . زور كلّ سد فيّا و كلّ نهر اللي انبنو بسواعد أبناءا عطول الدّهر اللّي شيّدا عرق رجال ,رجال بكلمة بتهدّ جبال رجال عرقا و دمّا امتزج بالتّراب محا من أرضا كل خراب و سراب و إضراب و عذاب و كذّاب كل محتلّ و مدمّر بيخرّب ما بيعمّر و وقت الجّد عن زنودنا بنشمّر كلّ شبّ و صبيّة و طفل و معمّر و اللّي بيتاخد منا بالقوّة, بالقوّة بنردّو و شبّاك اللّي بيجينا منّو الرّيح بنخفيه و بنسدّو و كل خائن بنلزمو حدّو و بنرمي عليه حمل يكسرو و يهدّو ,لك نحنا أسود الشّام حوالينا العالم حام لأنّو مجدنا عطول الزّمن دام و بيضلّ يدوم لأنّو عليه نحنا بنصوم و إذا وقعنا بنرجع و بنقوم متل النّسور بنحوم لحمنا مرّ و دمّنا حرّ و كنزنا أغلى من الدّهب و الدرّ بتحبّو تعرفوا السرّ :هويّتنا السّوريّة و نفسنا الأبيّة تعوّدنا عالحريّة وما بنرضى غير بهويّة عربيّة سوريّة أصليّة كسحت العالميّة عقلوبنا غاليّة و برواحنا مفديّة أقلّ منّا هديّة لأرض الكبريا و العبقريّة و الفروسيّة تعا لعنّا نحنا أرض السّلام طير و علّي عأرض الأحلام بتمحي من قلبك العتمة و من حياتك الظّلام متلنا ما بتلاقي بكل الدّني بالتّآلف و التّآخي و العيش الهني لا بالماضي و لا هلأ و لا بعد مليون سنة .
بيحاولو يدمّرو بلدنا بيحاولو يخرّبو حياتنا يخترقو أمنّا و يمحو ذكرياتنا عالقين قواص و رشّ و تفجير و إرهاب و الحرام أنو الدين حيطّينو حجاب بدن يغيّرو عأساس إصلاح و هنّي ما بيعرفو غير لغة السّلاح بالسّكاكين عالقين تقطيع و تخزيق بأجساد النّاس و بجثثن تهزيئ عملو منّها خرائط لخطتن البذيئة شعّلو فيهن النّار شعّلو فيهن حريقة ما بيعرفو مين الله ماعندن غير طريقة حاولو يدبّو فينا الطّائفيّة ردّينا عليهن و عملنا هويّة :اسمي سوريّا ديني سوريّا طائفتي سوريّا أمي و بيي سوريّا أخواتي 23 مليون .............................يتبع .